Dragon Fruit කථාවේ කථානායකයා අපට හමුවන්නේ හොරණ බුලත්සිංහල ප්රදේශයෙන්. ඔහු නමින් මනෝජ් කාරියවසම්ය. මනෝජ් වෘත්තියෙන් හමුදා නිළධාරියෙක්. හමුදා සේවයෙන් විශ්රාම ගිය පසු ව්යාපාර කිහිපයකම කටයුතු කරනු ලැබූ මනෝජ්ගේ සිතේ ඇදී තිබුනේ තමන්ගේම කියා ව්යාපාරයක් ආරම්භකර රටේ සංවර්ධනයට දායක වීමයි. කිසිදු කෙනෙකු අත නොගසන ඒ පිළිබඳව සිතන්නටවත් අපහසු ක්ෂේත්රයක් ඔහු තෝරා ගත්තා. ඒ Dragon Fruit වගා කිරීමයි.
ඉතිහාසයේ එක්තරා දවසක මනෝජ් තායිවානයට ගියේ Dragon Fruit වගාව සඳහා අවශ්ය තොරතුරු එක්රැස් කිරීමට සහ අධ්යයනය කිරීමටයි. සිය ඉලක්කය සම්පූර්ණ කරගෙන ඔහු නැවතත් මව්බිමට පැමිණියේ කෙසේ හෝ Dragon Fruit වගාව ආරම්භ කිරීම සඳහාය. මේ වෙනුවෙන් අරමුදල් මෙන්ම ඉඩමක්ද සොයා ගැනීම අවශ්ය විය. 1999 වසරේ ගම්පහ මුදුන්ගොඩ ප්රදේශයේ අක්කර 02 කින් මෙම ව්යාපාරය ඇරඹි මනෝජ් 2006 වන විට ශ්රී ලංකා ආයෝජන මණ්ඩලයේ අනුමැතිය සහිතව අක්කර 100 ක Dragon Fruit වගාව සඳහා අත්තිවාරම දමන ලදී. මේ සඳහා මූල්ය දායකත්වය ලංකාපුත්ර සංවර්ධන බැංකුවෙන් ලබා ගන්නා ලදී. මූල්ය ආයතන කිහිපයක් සමඟ මෙම වගාවට අදාළව අරමුදල් සම්පාදනය කර ගැනීම පිළිබඳව සාකච්ඡා කරනු ලැබූ බවත් ඉන් කිසිදු ප්රතිඵලයක් නොලැබුනු බවත් මනෝජ් පැවසීය. කෙසේ නමුත් උත්සාහය අතහැර දැමීමට ඔහු අකමැති විය. එලෙස උත්සාහය අතහරිනු ලැබූවේ නම් සාර්ථක ව්යාපාරිකයකු වීමට තිබූ අවස්ථාව මග හැරී යනු ඇත. ලංකාපුත්ර සංවර්ධන බැංකුවේ ආරම්භක ගණුදෙනුකරුවෙකු වන මොහු සාර්ථක ලෙසට නිසි කලට ණය වාරික ගෙවීම සිදුකරයි. මෙම ව්යාපාරයේ සාර්ථකත්වයේ රහස එය බව ඔහුගේ විශ්වාසයයි.
මනෝජ්ගේ වගාව සඳහා නිරන්තරයෙන්ම කාබනික පොහොර යොදා ගැනීමට කටයුතු යොදන අතර කාබනික වගාවන්ගේ ඵලදාව සදහා ඉහළ මිලක් ලබා ගත හැක. මේ නිසා නිරන්තරයෙන්ම මනෝජ් උත්සාහ ගන්නේ සියයට සියයක්ම කාබනික පොහොර යොදා සිය වගා කටයුතු සිදුකිරීම සඳහාය. මේ හේතුව නිසා හෙක්ටයාරයකින් මෙට්රික්ටොන් 36 ක් ලබා ගැනීමට හැකි වී ඇත. කෙසේ නමුත් ලෝකයේ Dragon Fruit වගාව සම්බන්ධයෙන් ප්රසිද්ධියක් උසුලන තායිවානයේ රසායනික පොහොර යොදා හෙක්ටයාරයකින් ලබා ගත හැක්කේ මෙට්රික් ටොන් 31 කි. මෙයින් පෙනී යන්නේ කාබනික පොහොර යෙදීම මගින් සාර්ථක අස්වැන්නක් ලබා ගත හැකි බවයි.
යුරෝපීය සංගමයේ තත්ව සහතිකය සඳහා මනෝජ් අයදුම් කොට ඇති අතර මේ වන විට අදාළ සහතික කිරීම හා සම්බන්ධයෙන් කටයුතු සිදුකෙරෙමින් පවතී. නිරන්තරයෙන්ම පාරිභෝගිකයන්ට හොඳ දෙයක් ලබා දීම මනෝජ්ගේ ඒකායන අරමුණයි. මෙම ව්යාපාරය සම්බන්ධයෙන් වසර 10 කට අධික කාලයක් පරීක්ෂණ පවත්වා ඇති අතර මේ වන විට ඉන් සාර්ථක ප්රතිඵල අත්වී තිබේ.
ලෝක වෙළඳපොලේ Dragon Fruit ඉල්ලුමෙන් ලංකාවට සැපයිය හැක්කේ ඉතාමත් අඩු ප්රමාණයකි. මේ වන විට ඉතාලියට සහ අරාබි රටවලට අපනයනය සිදුකරනු ලබන අතර ඉදිරියේදී වෙනත් රටවල් සඳහාද යොමු වීමට යෝජිතය. කෙසේ නමුත් ලෝක වෙළඳපොළේ මෙරට නිෂ්පාදිත Dragon Fruit සඳහා හොඳ ඉල්ලුමක් සහ මිලක් ලැබේ.
සාර්ථක ලෙස ව්යාපාරික කටයුතු කර ගෙන යාම සඳහා ප්රමාණය, ගුණත්වය, ඇසුරුම සහ ඒකාකාරී සැපයුම වැදගත් වේ. මෙය ගැනුම්කරුවන්ගේ විශ්වාසය දිනා ගැනීම සඳහා වැදගත් සාධකයක් බැව් මනෝජ් විශ්වාස කරයි. නිරන්තරයෙන්ම ගැණුම්කරුවන්ගේ විශ්වාසය හා අවශ්යතාවය තේරුම් ගැනීමට හැකිවන්නේ නම් එය සාර්ථක සැපයුම්කරුවකුගේ ගුණාංගයකි. මෙය තම ව්යාපාරයේ සාර්ථකත්වයේ රහස බව මනෝජ් පවසයි.
Dragon Fruit වගාව ඉතාමත් අවදානම් සහගත වගාවකි. කෙසේ නමුත් මෙම අවදනම් බව නොතකා ලංකාපුත්ර සංවර්ධන බැංකුව වගාවට මුදල් යොදවන්නට කටයුතු යෙදීම සම්බන්ධයෙන් ස්තුතිවන්ත වන බව මනෝජ් පවසයි. නිවැරදි ක්රමවේදයකට වගාවට අරමුදල් යොදා ගැනීම සම්බන්ධයෙන් ලංකාපුත්ර සංවර්ධන බැංකුව උපදෙස් ලබා දීම සම්බන්ධයෙන්ද ඔහු මෙහිදී අදහස් පළකලා.
මෙරට Dragon Fruit වගාකරුවන්ගේ සංගමයක්ද ආරම්භ කිරීම සඳහා කටයුතු යොදා ඇති මනෝජ් එහි සාමාජිකත්වය ලබා ගන්නා මෙන් දිවයිනේ විසිරී සිටින වගාකරුවන්ට ආරාධනා කරයි. කුඩා පරිමාණයේ වගාකරුවන් සඳහා රැකවරණය සැලසීම‚ අපනයන වෙළඳපොළේ ශ්රී ලංකාවේ නම රැක ගැනීම, කාබනික වගාවක් ලෙසට ප්රචලිත කිරීම සහ සෑම වගාකරුවන්ගේම ඵලදාව එකතුකොට නිසි වටිනාකමක් ලබා දීම ෙමන්ම දියුණු තාක්ෂණික ක්රමවේදයන් වගාවට හඳුන්වා දීම ෙමම සංගමයේ අරමුණු ෙවයි. මේ සඳහා වගාකරුවන් ෙපළගැස්වීමට කටයුතු සම්පාදනය කොට ඇති බව පැවසු මනෝජ් මහතා දැනටමත් ශ්රී ලංකාවේ Dragon Fruit වගාකරුවන්ගේ සංගමයේ සාමාජිකයන් 200 සිටින බැව් පැවසීය.
මනෝජ් කාරියවසම් මහතා,
කළමණාකරණ අධ්යක්ෂ,
SIECO ඇග්රි කල්චර් (පුද්ගලික) සමාගම,
තැ. ෙප. 07, ආදර්ශ ගොවිපල,
බතලේගම,
බුලත්සිංහල. |
